Leedjesaovendj: 1 december aansjtaonde!

Op zaoterdig 1 december vanaaf 20.11 as. zól weer de jaorlikse leedjesaovendj in zaal de Harmonie plaatsvinje. 

Op dizze aovendj zal d’r door de diverse deilnaemers inne categorieje “Origineel” en “Covers” sjtried waere geleverdj om de felbegeerdje “Chrit Breukers Trofee”.

Chrit Breukers waerdje in ós jubileumjaor 2017 door de Linnerluuj verkaoze toet winnaar vanne Linner top 111. Hae dae dit mit de alom bekindje evergreen “Det kin in Lin allein !” Es ultieme waardering veur dizze prestatie haet ’t comite daonao besjlaote det de winnaars vanne toekomstige Linner Leedjesaovendje bekroondj waere mit ‘n baeker, vernumdj nao oze “groeatste” muzikale dörpsgenoeat! Veur jaor won Har Sjlabbers es “HIGH” deze noe al prestigieuze pries. Waem geit ’t dit jaor waere ??

Natuurlik is ’t veur idderein meugelik om aan dizze leedjesaovendj mit te doon; det kintj allein, mit vrunj, mit de buurt of mit ’n vereiniging, gezelligheid en ’n sjoeane onvergaetelike aovendj is gegarandeerdj.... Moch g’r interesse höbbe, informiëer den gerös bie emes vanne Kwekkerte;

Notieër in idder geval in eur agenda: zaoterdig 1 december v.a. 20.11, De Linner Leedjesaovendj !