Kwekgala's 2018! Hie geit 't kraake

Hie geit ’t kraake!! Op zaoterdig 27 en zunjig 28 januari 2018 as. zólle weer de jaorlikse KwekGala’s plaatsvinje inne Hermeniezaal van Lin.
Dit jaor zal de sjpreuk van prins Bart II, “Geine tied om te kwaake, want hie geit ‘t kraake”, ’t thema zeen waat de roeaje draod door ’t program zal vorme.
Ongetwiefeldj zal namelik de hermeniezaal in Lin op zaoterdig en zunjig in al heur voge gaon kraake….
Ouch dees oetgave vanne Gala-aovendj en middig zitj namelik weer boordevol artieste die heur sjpaore inne vastelaoveswèrreldj al mieér den verdeendj höbbe. Oppe zaoterdigaovendj en/of zunjigmiddig zólle naeve échte Linner artieste zoea wie de Colboys, Veer tinte gries, Kwek, de Kwaakers, duo Vórsvrie, de Anger Hellef, de Gleddejoole, High, de dansgardes vanne Kwekkerte en kuulköp ouch ’n aantal gevestigdje name oppe bühne sjtaon.

De buteredners Eric Reck, Henri van Geneijgen, Wichard de Benis en Frans Bevers zeen absolute toppers en sjtök veur sjtök (aod) finaliste vanne Limburgse en Braobantse butekampioensjappe. Op zaoterdig zól ’t muzikale sjlotakkoord van Ziesjoem komme terwiel op zunjig Toeter Thijs veur ’n waardige apotheose geit zörge. Kortom, op beide daag ’n program mit ‘n line-up aan artieste wo se dich de vingers bie moogs aaflèkke…..

Muzikaal kintj g’r op beide daag volop genete van de juuste sjtummingsmeziek van os eige Linner Combo onger leiding van Hans Janssen. Aafgeloupe jubileumjaor höbbe v’r es organiserendje vereniging väöl reacties en complimente moge ontvange en v’r haope den ouch det dit zich moog vertale nao 2 daag ’ne good gevuldje zaal !!!

De entreepries bedreugtj ouch dit jaor sjlechs 12,50 euro. De kaartverkoup zal zeen op dónderdig 18 januari as. en vanaaf 19.30 oer plaatsvinje in óze tempel van dit jaor, café den Tegel. Haojer van eine vrunjkaart vanne Linner vastelaovendj höbbe rech op 1 gratis entreekaart oppe daag van eige keuze.

Notieër uch dus alvas oppe kalender en inne agenda: KWEKGALA 2018: ZAOTERDIG 27 EN ZUNJIG 28 JANUARI 2018 “Det wiltj g’r toch zeker neet misse!"